អ្នកកាន់សាសនាឥស្លាមនៅទូទាំងសាកលលោកកំពុងតែប្រារព្ធបុណ្យរ៉ាម៉ាដាន ដែលជាបុណ្យសាសនាដ៏សំខាន់បំផុតក្នុងសាសនាឥស្លាម។ នៅក្នុងអំឡុងពេលនេះនៃការធ្វើការត្រិះរិះ និងការប្តេជ្ញាចិត្តជាថ្មី អ្នកកាន់សាសនាធ្វើការតមអាហាររាល់ថ្ងៃ ចាប់ពីពេលមុនថ្ងៃរះ រហូតដល់ពេលថ្ងៃលិច ដើម្បីបង្កើនអំណរគុណ និងការភ្ញាក់រលឹកពីក្តីមេត្តារបស់ព្រះ។ អំឡុងពេលនេះក៏ជាពេលនៃការផ្តល់អំណោយទានផងដែរ ដោយអ្នកកាន់សាសនាឥស្លាមជួយអ្នកដែលរងគ្រោះដោយសង្គ្រាម ការអត់ឃ្លាន ភាពក្រីក្រ និងជំងឺ។ នៅប្រទេសកម្ពុជា ក្រុមចាមដែលមានចំនួនភាគតិច ក៏កំពុងប្រារព្ធបុណ្យរ៉ាម៉ាដានផងដែរ ដែលជាសសរស្តម្ភមួយក្នុងចំណោមសសរស្តម្ភទាំង ៥ ក្នុងសាសនាឥស្លាម។ ក្នុងរយៈពេលដែលខ្ញុំធ្វើជាឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជា ខ្ញុំចាត់ទុកការកសាង និងពង្រឹងទំនាក់ទំនងមិត្តភាពជាមួយគ្រប់សហគមន៍ទាំងអស់នៅកម្ពុជា ដោយរួមទាំងក្រុមចាមដែលកាន់សាសនាឥស្លាមផង គឺជាអាទិភាពមួយសំរាប់ស្ថានទូតអាមេរិក។
ជាមួយអ្នកមកពីសហគមន៍ចាមកាន់សាសនាឥស្លាម នៅក្នុងពិធីបរិភោគអាហារស្រាយបួស Eid al-Fitr នៅក្នុងស្ថានទូត។
ក្នុងមួយឆ្នាំៗពេញ ស្ថានទូតអាមេរិកចូលរួមជាមួយអ្នកកាន់សាសនាឥស្លាមនៅកម្ពុជា នៅក្នុងការខិតខំជួយពង្រឹងសហគមន៍របស់គេ តាមរយៈកម្មវិធីមួយចំនួន។ ឧទាហរណ៍ យើងបានរៀបចំពិធីអាហារស្រាយបួស (Iftar) សំរាប់ក្រុមអ្នកកាន់សាសនាឥស្លាម ដើម្បីអបអរពិធីនៅដំណាច់បុណ្យរ៉ាម៉ាដាន។ កម្មវិធីផ្តល់អាហារូបករណ៍ខ្នាតតូចផ្នែកភាសាអង់គ្លេសរបស់យើងផ្តល់ឱកាសដល់សិស្សនៅកម្ពុជារាប់រយនាក់ ក្នុងមួយឆ្នាំៗ ដោយផ្តោតជាពិសេសលើសហគមន៍នៃអ្នកកាន់សាសនាឥស្លាម ដើម្បីលើកកំពស់ជំនាញរបស់គេផ្នែកភាសាអង់គ្លេស។ នៅក្នុងប្លក់កន្លងមករបស់ខ្ញុំ ខ្ញុំបានសរសេរអំពីការដែលកម្មវិធីនេះបានធ្វើអោយ Afiny Math អាចរកបានការងារធ្វើ ដោយប្រើជំនាញផ្នែកភាសាអង់គ្លេសរបស់នាង ដើម្បីកសាងអនាគតមួយភ្លឺស្វាង សំរាប់នាង និងសំរាប់គ្រួសារនាង។
Afiny Math ដែលបានរៀនចប់ក្នុងកម្មវិធីអាហារូបករណ៍ខ្នាតតូចផ្នែកភាសាអង់គ្លេសរបស់ស្ថានទូតអាមេរិក គឺជាជនគំរូម្នាក់ និងជាឧទាហរណ៍ដ៏ល្អមួយស្តីពីការដែលការរៀនភាសាអង់គ្លេសអាចផ្តល់ផលសំរាប់ជីវិត។
លើសពីនេះទៀត យើងបានជំរុញអត្ថន័យនៃការអត់ឱនផ្នែកសាសនា និងការប្រឆាំងហឹង្សាតាមរយៈការប្រគំតន្រ្តីសន្តិភាពដៅលើយុវជន ដែលត្រូវបានធ្វើនៅទូទាំងប្រទេស។ ប្រជាជនកម្ពុជារាប់ម៉ឺននាក់បានទស្សនាការប្រគំតន្រ្តីនៅឆ្នាំនេះ នៅខេត្តបន្ទាយមានជ័យ បាត់ដំបង កំពង់ចាម កំពង់ឆ្នាំង ពោធិសាត់ និងខេត្តត្បូងឃ្មុំ។ កម្មវិធីរបស់យើងដែលមានឈ្មោះថា កម្មវិធីសំណេះសំណាលសាសនិកឥស្លាមអន្ដរជាតិ (Muslim Dialogue Program) ធ្វើអោយអ្នកកាន់សាសនាឥស្លាមនៅកម្ពុជាបានចូលរួមក្នុងសិក្ខាសាលា ដែលមានវាគ្មិនជាភ្ញៀវមកពីទូទាំងតំបន់អាស៊ីអាគ្នេយ៍។ សិក្ខាសាលាទាំងនេះផ្តោតលើប្រធានបទសំខាន់ៗជាច្រើន ដូចជាសហប្រតិបត្តិការរវាងសាសនា ការផ្តល់អំណាចដល់ស្រ្តី ភាពជាអ្នកដឹកនាំក្នុងសហគមន៍ និងដំណោះស្រាយចំពោះជំលោះ។ ស្ថានទូតអាមេរិកគាំទ្របេតិកភណ្ឌចាម តាមរយៈការបោះពុម្ពទស្សនាវដ្តីជាភាសាខ្មែរ និងភាសាចាម ដែលមានឈ្មោះថា Mukva ។ ទស្សនាវដ្តីបែបនេះគឺជាទស្សនាវដ្តីដំបូងបំផុតនៅកម្ពុជា ហើយមានព័ត៌មាននិងរឿងទាក់ទងនឹងប្រជាជនចាមកាន់សាសនាឥស្លាម ដោយជួយអភិរក្សផ្នែកដ៏សំខាន់មួយនៃបេតិកភណ្ឌផ្នែកភាសា និងវប្បធម៌របស់ប្រទេសកម្ពុជា។
ប្រជាជនកម្ពុជារាប់ពាន់នាក់បានទស្សនាការប្រគំតន្រ្តីសន្តិភាព ដែលជំរុញភាពអត់ឱនផ្នែកសាសនា និងអហឹង្សា។
កុមារីកាន់សាសនាឥស្លាមស្តាប់វាគ្មិនក្នុងកម្មវិធីសំណេះសំណាលសាសនិកឥស្លាមអន្ដរជាតិ នៅក្នុងសាលាមួយ ក្នុងខេត្តកំពង់ចាម។
មានកម្មវិធីមួយចំនួនតូចក្នុងចំណោមកម្មវិធីដែលឧបត្ថម្ភដោយសហរដ្ឋអាមេរិក ដែលកំពុងជួយឥស្លាមសាសនិកនៅកម្ពុជាអោយមានជំនាញ និងចំណេះដឹងដែលនឹងជួយគេអោយសំរេចគោលដៅរបស់គេនៅក្នុងជីវិត ហើយរួមចំណែកបានល្អដល់សហគមន៍របស់គេ និងសង្គមកម្ពុជា។ ខ្ញុំរីករាយនឹងបន្តពង្រឹងចំណងមិត្តភាព និងកិច្ចសហប្រតិបត្តិការនេះ ជាមួយសហគមន៍ឥស្លាមនៅកម្ពុជា។
ជាទីបញ្ចប់ ខ្ញុំសូមជូនពរដល់ឥស្លាមសាសនិកទាំងអស់ ក្នុងខែបុណ្យរ៉ាម៉ាដាននេះ។ ខ្ញុំសង្ឃឹមថា បុណ្យរ៉ាម៉ាដាននេះពោរពេញទៅដោយពរជ័យសំរាប់លោកអ្នក និងគ្រួសាររបស់លោកអ្នក។
